Page 27 - Riet
P. 27
RIET IN DE HAAST
Ritmisch boegen
stengels in de noordewiend,
ploemen van bruun flewiel
zingen heur stille naojaors liet.
De haast blaost
mit zien koolde oaosem
deur de spitse grune blaeden
an de natte wallekaant.
Rietkraggen golven op en daele
tussen zeggepollen en hevetillen,
oktober stikt zien roezige gezicht
ni’jsgierig tussen toekomstig dekriet.
Een rietmuskien vligt
onrustig uut zien schoelplak,
een ente fladdert snaeterende vot
tegen de grieze middaglocht.
De rietsnieder wodt onrustig,
legt zien klompleerzen klaor.
Vuult in gedaachten
et sompige laand om zien aankels.
De foele regen striemt
de walsende waeterkaant,
verkleurt nao suterige daegen
de grune glaans in giel...
Harmen Houtman
